जनकपुरधाम । धनुषा जिल्लामा सामाजिक सद्भाव, आपसी भाइचारा र शान्ति कायम गर्न सर्वपक्षीय बैठकले निर्णय गरिएको छ ।
जिल्ला प्रशासन कार्यालय धनुषामा मंगलवार आयोजित सर्वपक्षीय बैठकमा पछिल्लो समय देखिएका सामाजिक तथा धार्मिक संवेदनशील विषय, सामाजिक सञ्जालमार्फत फैलिने अफवाह र भ्रामक सूचनाबाट उत्पन्न हुनसक्ने द्वन्द्वबारे गम्भीर छलफल गरिएको छ ।
वक्ताहरूले धनुषा बहुजातीय, बहुधार्मिक र बहुसांस्कृतिक जिल्ला भएकाले आपसी सहिष्णुता, सम्मान र संवाद नै सामाजिक एकताको आधार भएको बताएका छन् । कुनै पनि बहानामा सामाजिक सद्भाव बिगार्ने गतिविधि अस्वीकार्य हुनेमा सबै पक्ष एकमत देखिएका थिए ।
राजनीतिक दलका प्रतिनिधिहरूले सामाजिक शान्ति र सद्भावका विषयमा साझा जिम्मेवारी रहने प्रतिबद्धता जनाए भने नागरिक समाजका अगुवाहरूले समुदायस्तरमै सचेतना र संवाद आवश्यक रहेको बताए ।
हिन्दु तथा मुस्लिम धर्मगुरुहरूले धर्मको नाममा घृणा फैलाउने कार्य गलत भएको उल्लेख गर्दै धार्मिक सहिष्णुता र संयम अपनाउन आग्रह गरे । पत्रकारहरूले जिम्मेवार र तथ्यपरक समाचार सम्प्रेषणको आवश्यकता औंल्याए भने सुरक्षा निकायले शान्ति सुरक्षामा कडाइ गरिने चेतावनी दिए ।
छलफलको निष्कर्षमा सबै पक्षले सामाजिक सद्भाव कायम गर्न सहकार्य, संवाद र विभाजनकारी गतिविधिको विरोध गर्ने सहमति गरेका छन् । वैठकमा राजनीतिक दलका प्रतिनिधि, नागरिक समाज, हिन्दू–मुस्लिम समुदायका धार्मिक अगुवा, पत्रकार तथा सुरक्षा निकायका प्रतिनिधिहरूको सहभागिता रहेको थियो ।
सम्बन्धित खबर
